كل مااشوفک بالطيف
لازم تهب نسمة صيف
من نومتی اتصحينی
ماادری يالغالی اشصار
لا هُدهُد ايجيب اخبار
وانه الهجر ماذينی
وانه الهجر ماذینی
*** *** ***
يلنايم ابعينی حزن
بالصدفه يغمضلی جفن
واصرخ مثل گلبی الجرحته
ناحن حمامات السفر
وبناظری جمره ومطر
ليله بالف ليل السهرته
ارجع ولو ساعه ردت
خاطر اگلک من رحت
چم خاطر ابخاطر كسرته
يابوالوفه يالمبتعد
تترک عليله او ماترد
لاگلبک ايحن اعله بنته
بلله اشيصبرنی اعليک
لااندل واوصل ليک
وبغربتی امخلينی
ظليت ادور تذكار
لاهُدهُد ايجيب اخبار
وانه الهجر ماذينی
وانه الهجر ماذینی
*** *** ***
ظل يدوی بضلوعی اللهب
تتناثر ادموعی عتب
والورگه عَلون علمتها
اتعذب ابجرحی ملح
كلساعه اعدل وانذبح
چم ذبحه بغيابک شفتها
مشتاگه ابوسک بالنحر
بوسة طفل گلبه انكسر
موته وعلىٰ صدرک ردتها
امشی وادقق بالنظر
لجدامک اتبين اثر
طحت اعله وجهی وقبلتها
من ينترس وجهی اتراب
ازحف وانام على الباب
حر الهوه ايغطينی
اطفی الجمر واشعل نار
لاهُدهُد ايجيب اخبار
وانه الهجر ماذينی
وانه الهجر ماذینی
*** *** ***
افتر وادور كل كتر
لازم اله ذكرىٰ وعطر
اذكر گبل منا يجينه
اهنا اذُكره من سجد
منا مشه واهنا گعد
اهنا گلی يابنيتی الحنينه
اهنا شبگنی بلهفته
للحين احس بقبلته
واتشابگن عينی اويه عينه
اهنا نشد عن صحتی
يفرح ابويه ابضحكتی
گاودنی ولزينب مشینه
راح واخذ كلشی وياه
ظلت مدامع فرگاه
تجرحنی وتواسينی
تاليها مارد للدار
لاهُدهُد ايجيب اخبار
وانه الهجر ماذينی
*** *** ***
تحت التراب انظر هدم
بی ريحة الخوه اشم
هذا العلی الاكبر عرفته
الزمته من طرف وطرف
چنه علی اگبالی وگف
ناديته ياخويه وشبگته
مرات امسكه امن الردن
وامشی مع الاكبر اظن
عفيه اخويه اليلزم اخته
يثگل قميصک ياعلی
اتراب ومدامع يمتلی
طين امتله بس ماغسلته
خوفی علىٰ عطره ايروح
من شمته اترد الروح
من المرض يشفينی
حكم الدهر والاقدار
لاهُدهُد ايجيب اخبار وانه الهجر ماذينی
*** *** ***
انظر مهد مابی ضوه
خالی ويهز بيه الهوا
گلبی جفل مثل الحمامه
وتراوه ابمهده سهم
حتى الوساده بيها دم
سترک يرب من هالعلامه
ناغيته ويصب مدمعی
وبلا شعور ولا وعی
عبدالله ترجع بالسلامه
شتگله امه اتذكرت
نام الحبيب ومانمت
چانت تناغی بابتسامه
اتذكر امه شتگول
نام الولد دللول
غالی واعز من عينی
راح وصحت ياستار
لاهُدهُد ايجيب اخبار
وانه الهجر ماذينی
*** *** ***
كل مايجی وقت الظهر
يمی احس يصهل مهر
وينادی ياعالم هضيمه
واركض واباوع للسمه
لون احمر ويمطر دمه
حتى الهوا خايف نسيمه
ها يلمهر گلی اشحصل
گلی بقيتی ابلا اهل
زينب تره ماعدها خيمه
خصم الكلام اتيسرت
وضلوع ابوچ اتكسرت
يعنی انتی من هسه يتيمه
ظليت ادگ اعله الراس
لاوالدی ولاعباس
حادي الحزن يحدينی
شوف الزمن من يندار
لاهُدهُد ايجيب اخبار
وانه الهجر ماذينی
*** *** ***
ظليت اعاين عالدرب
مهضومه مكسورة گلب
لن صوت ابن حذلم اسمعه
ام البنين اتعنته
وانی اركضت وی صيحته
جاوب دليلی لاتصدعه
گلی هلچ راحوا چتل
والوالد ابلای غسل
مرمی ولا واحد يشيعه
گلی وبعد غير الذبح
الف وسبعمية جرح
جسمه توزع من يجمعه
ماشفنه غير مچتول
عاري وتسحگه الخيول
وينادي من يروينی
والعليه صارت طشار
لاهُدهُد ايجيب اخبار
وانه الهجر ماذينی
*** *** ***
للشاعر:سیدعبدالخالق المحنه
الکلمات البحثیه:
