نظرة عینک ... تسبیحة عشّاگ
تگرب تبعد ... لعیونک
اشتاگ
*** *** ***
لیل او گمره بعیونک وغیاب
وانه ابدونک ابقه ابلا احباب
یوم التبعد احسب الف احساب
لمّن ترجع تلگانی اعله الباب
بینی وبینک ... ما مقبول افراگ
تگرب تبعد ... لعیونک اشتاگ
*** *** ***
ها یلغالی سبحان
الخلّاک
تبعد عنّی تاخذ روحی اویاک
لوتنسه امّک امّک ماتنساک
جاسم یبنی تذبحنی ابفرگاک
یمّه اغیابک ... حنظل ماینضاگ
تگرب تبعد ... لعیونک اشتاگ
*** *** ***
من ماشوفک افتر عالبیبان
گلبی ایرفرف من انظر شبّان
لیلة زفتک حلمی الاخر چان
شمعة عرسک تضویلی الأکوان
عینی وعینک ... نظرات او اشواگ
تگرب تبعد ... لعیونک اشتاگ
*** *** ***
یمّه اهدومک وین انودّیهن
لیل انهاری اتباوع بیهن
عطرک لسّه موجود اعلیهن
من اشتمهن شوگی ایناقیهن
نمت اویاهن ... یخلص لیلی اشباگ
تگرب تبعد ... لعیونک اشتاگ
*** *** ***
چنت احسبلک تکبر وافرح بیک
لیلة حنتک واچفوفی اتحنّیک
اشعر کلشی ظل یحسدنی اعلیک
ادعو الباری یا جاسم یحمیک
حالی اخلافک ... صیحه او شگ ازیاگ
تگرب تبعد ... لعیونک اشتاگ
*** *** ***
بین اصحابک شفتک احلاهم
هسّه اتباوع ماتمشی اویاهم
وابلا وعیی اتبع ممشاهم
مرّات اوگع لمّن الگاهم
رایح یبنی ... وانه اجروحی اغماگ
تگرب تبعد ... لعیونک اشتاگ
*** *** ***
ماشفت العید من ساعة هجرک
ناس اتعیّد وانه امشی الگبرک
بیدی الشمعه تگعد انتظرک
عمر الورده ذبحوک ابعطرک
یمضیّعنی ... سطرة دهری الحاگ
تگرب تبعد ... لعیونک اشتاگ
*** *** ***
یامه او یامه اسهرلک واتنام
وانظر وجهک واغرگ بلأحلام
لمسة ایدک تشفیلی
الالآم
لیش امن ایدی رایح یاجسّام
عاصف هجرک ... یمّه اینشف اریاگ
تگرب تبعد ... لعیونک اشتاگ
*** *** ***
للشاعر:سیدعبدالخالق المحنه
الکلمات البحثیه:
